Pasar…..

Kotamobagu mulai berbenah. Semua setuju bahwa Kotamobagu memang sudah melangkah untuk maju, termasuk Abo’ dan Bua’.

“Kita kua’ cuma mobapikir soal pasar. Masa’ so samua kecamatan ada dia pe pasar,” kata Abo’.

“Ngana ini salalu bakritik. Ngana pe kira cuma ngana yang pande so? Di Pemkot itu penuh deng orang pande kasiang,” debat Bua’.

“Ngana lagi salalu baserang kita pe pemikiran tapi ndak pernah mo kase jalan keluar. Co kase kamari solusi…”

“Polusi? Blum ada polusi di Kotamobagu. Dia pe kendaraan cuma bentor deng oto, bagimana mopolusi. Juga blum ada pabrik…”

“Nah, ngana pepikiran ini so malayang kamana-mana. Kita bicara solusi, ngana bilang polusi. Bablajar pa bolot so.”

“Sebenarnya pasar itu bagus, Abo’, bua’. Supaya pemerataan ekonomi ada. Doi jangan cuma baputar di pasar lama,” Ompu urun rembug dan mencoba menenangkan.

“Nah, dengar pa Ompu,” kata Bua’.

“Iyo, kita dengar ini. Makanya ngana badiang dulu,” Abo’ marah.

“Selain itu, torang pe pasar ini laeng daripada yang laeng,” Ompu tak peduli pertentangan Abo’ dan Bua’, dia terus menjelaskan. “Torang pe pasar ini bagus kalu dikembangkan jadi pasar komoditi. Jadi di selatan torang ba jual milu, kadele dan laeng-laeng yang merupakan tanaman pangan dari Dumoga. Di Utara deng Timur komoditi sayur-sayuran dari Modayag deng Passi Timur. Di Barat bajual ikang…”

“Tapi kalu mobekeng tinutu’an bagimana dank? Masa’ musti mopigi di empat pasar?” potong Bua’.

“Nyanda’ musti bagitu ley, Bua’. Biar ley dia pe nama pasar komoditi tapi tetap ada yang bajual samua kebutuhan sehingga ndak perlu mopigi di empat pasar kalu babekeng tinutu’an.”

“Kong apa dia pe guna mokase nama pasar komoditi?” tanya Abo’.

“Kase nama bagitu karena disitu yang paling banyak mojual ya komoditi tertentu seperi kita bilang tadi,” jelas Ompu. Bua’ dan Abo’ menganggukan kepala. “Ini terutama mempermuda pa orang luar Kotamobagu untuk bacari komoditi tertentu sehingga Kotamobagu menarik pa dorang. Pasar bajalang bagus kong PAD Insya Allah momeningkat.”

“Apa di daerah laeng ley bagini? Kita pe maksud, banyak dia pe pasar.”

“Malang sama dengan torang. Kong dorang jadi daerah terbesar kedua setelah Surabaya di Jawa Timur dari perputaran doi capat.”

“Butul pa ngana, Ompu. Tapi masih ada satu masalah…”

“Pa ngana ini salalu masalah,” Bua’ memotong Abo’.

“Ini masalah mendasar, Bua’.”

“Masalah apa kang?” Ompu mendahului Bua’.

“Kiapa dank itu pasar blum bajalang?”

Artikel Terkait: